हेमन्त चर्चा

अध्येता बाबुनानीहरू, यो अङ्कमा हेमन्त ऋतुको बारेमा चर्चा गर्दैछु । यो उपजाति छन्दमा छ । अरू ऋतुहरूको चर्चा पनि आगामी अङ्कमा क्रमशः प्रस्तुत हुने नै छन् ।

हेमन्त ठन्डी सुरुमै हुनाले
प्राणी सबै थर्थर काम्न थाले
खाने कुरा जे छ रुचेर पच्छ
परन्तु ठिक्कैसँग खानुपर्छ ।

हेमन्तमा भिन्न कथा विशेष
भरी भकारी धनधान्य वेश
विपन्न होस् तापनि हुन्छ तुष्ट
सम्पन्नकै छाँट उही दुरुस्त ।

जाडो बढे तापनि खान बस्न
प्रशस्त उस्को त्यतिखेर धन्य
छ लोक सानन्द धनी समान
विशेषता यो ऋतुमा महान ।

यो पञ्चमी मङ्सिर शुक्लपक्ष
हेमन्त अन्तर्गत चारु स्वच्छ
आयोजना उत्सव यो विचित्र
विदेहको देश यसै पवित्र |

श्रीरामसीता शुभ त्यो विवाह
दाम्पत्यका लागि नयाँ प्रवाह
त्यो शश्यले श्यामल शुभ्र वेश
रमाइलो हुन्छ त्यहाँ विशेष ।

-- यदुनाथ सरल